रायगड पोलीस अधीक्षक कार्यालयात कोट्यवधींचा आर्थिक घोटाळा लेखा शाखेत १ कोटी ७८ लाखांचा अपहार; पती-पत्नी ताब्यात, पोलिस प्रशासनात खळबळ

अलिबाग : सुमित क्षिरसागर

रायगड जिल्हा पोलिस अधीक्षक कार्यालयालाच हादरवून टाकणारा कोट्यवधींचा आर्थिक अपहार उघडकीस आला असून, लेखा शाखेत कार्यरत असलेल्या कर्मचाऱ्यानेच सरकारी तिजोरीवर डल्ला मारल्याचा धक्कादायक प्रकार समोर आला आहे.
या प्रकरणात राजेश जाधव आणि त्याची पत्नी रिया जाधव यांना पोलिसांनी ताब्यात घेतले असून, एकूण १ कोटी ७८ लाख रुपयांचा अपहार झाल्याचे प्राथमिक तपासात स्पष्ट झाले आहे.

चार वर्षांत रचलेला आर्थिक कट

पोलिस अधीक्षक कार्यालयाच्या लेखा शाखेत कार्यरत असलेला राजेश जाधव याने आपल्या पदाचा गैरवापर करत २०२१ ते २०२५ या कालावधीत हा आर्थिक गैरप्रकार केल्याचे उघड झाले आहे.
पोलीस पाटील व इतर मानधनधारकांच्या नावावर बनावट नोंदी, खोटी देयके आणि फसवे व्यवहार करत सरकारी निधी थेट स्वतःच्या आणि पत्नीच्या खात्यात वळवण्यात आला.

खात्यांत कोट्यवधींची रक्कम

लेखा तपासणीदरम्यान आढळून आलेल्या माहितीनुसार,
राजेश जाधवच्या बँक खात्यात सुमारे ७२ लाख रुपये,
तर पत्नी रिया जाधवच्या खात्यात १ कोटी रुपयांहून अधिक रक्कम जमा झाल्याचे समोर आले आहे.
या संशयास्पद व्यवहारांमुळे वरिष्ठ अधिकाऱ्यांनी तातडीने चौकशीचे आदेश दिले आणि घोटाळ्याचा पर्दाफाश झाला.

लेखा तपासणीत उघडकीस आला प्रकार

११ व १२ डिसेंबर २०२५ रोजी झालेल्या अंतर्गत लेखा तपासणीत व्यवहारांतील मोठ्या प्रमाणावरील विसंगती आढळून आली. त्यानंतर या प्रकरणाची गंभीर दखल घेत अलिबाग पोलिस ठाण्यात गुन्हा दाखल करण्यात आला आहे.

आर्थिक गुन्हे शाखेचा तपास सुरू

या प्रकरणाचा तपास आता आर्थिक गुन्हे शाखेकडे (EOW) सोपवण्यात आला असून,
या अपहारात आणखी कर्मचारी, दलाल किंवा बाहेरील व्यक्तींचा सहभाग आहे का,
याची कसून चौकशी सुरू आहे.
तपासात आणखी मोठे आर्थिक गैरव्यवहार उघड होण्याची शक्यता पोलिस सूत्रांकडून व्यक्त करण्यात येत आहे.

पोलिस प्रशासनात अस्वस्थता

अत्यंत संवेदनशील मानल्या जाणाऱ्या पोलिस अधीक्षक कार्यालयातच असा घोटाळा घडल्याने संपूर्ण पोलिस प्रशासनात खळबळ उडाली आहे.
या घटनेमुळे अंतर्गत नियंत्रण व्यवस्थेवरही प्रश्नचिन्ह निर्माण झाले असून, वरिष्ठ पातळीवरून कठोर कारवाईचे संकेत देण्यात आले आहेत.