🎯 ब्रेकिंग ; ठाण्यात पंतप्रधान नरेंद्र मोदी यांच्या विक्रमी कार्यकाळानिमित्त महाआरती

159

0 5 1 8 8 7

संतोष पडवळ – प्रतिनिधी

ठाणे ता १० जून : पंतप्रधान नरेंद्र मोदी यांनी स्वतंत्र भारताच्या इतिहासात सर्वाधिक काळ पंतप्रधानपद भूषविण्याचा ऐतिहासिक विक्रम प्रस्थापित केल्याच्या पार्श्वभूमीवर ठाण्यात भाजपच्या वतीने विशेष महाआरतीचे आयोजन करण्यात आले. वसंत विहार नाका येथील हनुमान मंदिरात पार पडलेल्या या कार्यक्रमात पंतप्रधानांच्या उत्तम आरोग्य, दीर्घायुष्य आणि देशाच्या सततच्या प्रगतीसाठी प्रार्थना करण्यात आली.

यावेळी कोकण पदवीधर मतदारसंघाचे आमदार व भारतीय जनता पक्ष महाराष्ट्र प्रदेश सरचिटणीस ॲड. निरंजन डावखरे यांनी मोदी सरकारच्या १२ वर्षांच्या कार्यकाळातील विविध कामगिरीचा आढावा घेतला. त्यांनी सांगितले की, गेल्या बारा वर्षांत भारताने जागतिक स्तरावर नवी ओळख निर्माण केली असून देशाला विकासाच्या नव्या उंचीवर नेण्याचे काम पंतप्रधान नरेंद्र मोदी यांच्या नेतृत्वाखाली झाले आहे. कोरोना महामारीच्या काळात जगभरातील अनेक देश आर्थिक संकटात सापडले असताना भारताने केवळ परिस्थितीचा यशस्वी सामना केला नाही, तर जगातील सर्वात वेगाने वाढणाऱ्या अर्थव्यवस्थांपैकी एक म्हणून स्वतःचे स्थान कायम राखले, असे डावखरे म्हणाले. तसेच सध्या जगभरात युद्धजन्य आणि अस्थिर परिस्थिती असतानाही भारत आर्थिक आणि सामाजिकदृष्ट्या स्थिर असल्याचा दावाही त्यांनी केला.

“पंतप्रधान मोदी यांच्या नेतृत्वामुळे भारताची जागतिक पातळीवर वेगळी ओळख निर्माण झाली आहे. पायाभूत सुविधा, डिजिटल क्रांती, संरक्षण, परराष्ट्र धोरण आणि सामाजिक कल्याण योजनांमुळे देशाचा सर्वांगीण विकास झाला आहे,” असे ते म्हणाले. यावेळी त्यांनी विरोधकांवरही अप्रत्यक्ष टीका केली. “देशाच्या प्रगतीकडे दुर्लक्ष करून काहीजण केवळ राजकीय कारणांमुळे टीका करत आहेत. मात्र विकासाची कामे जनतेसमोर स्पष्टपणे दिसत आहेत,” असे आमदार ॲड. निरंजन डावखरे यांनी नमूद केले. देशभरातील विविध मंदिरांमध्ये पंतप्रधानांच्या दीर्घायुष्यासाठी आरती आणि प्रार्थना करण्यात येत असल्याचे सांगत त्यांनी सर्व भारतीयांच्या सुख-समृद्धीसाठीही प्रार्थना केली.