🎯 ब्रेकिंग ; खासदार सुनील तटकरें यांचा कर्जत येथील आमदार महेंद्र थोरवेंवर ६५ कोटींचा मानहानी दावा !

शिवनेरी न्यूज15/03/2026

298

[wps_visitor_counter]

सुमित क्षीरसागर – प्रतिनिधी

कर्जत ता १५ मार्च : खासदार सुनील तटकरे यांनी शिंदे गटाची शिवसेना पक्षाचे कर्जतचे आमदार महेंद्र थोरवे यांच्या विरोधात थेट न्यायालयात धाव घेतली असून आमदार थोरवे यांच्या अत्यंत गंभीर आरोप व विधानांमुळे आपली बदनामी झाल्याचा ठपका ठेवला असून खासदार तटकरे यांनी त्यांच्यावर तब्बल ६५ कोटी ३ हजार रुपयांचा मानहानीचा खटला दाखल केला आहे. हा महत्त्वपूर्ण दावा माणगाव येथील दिवाणी न्यायालयात दाखल करण्यात आला असून, या कायदेशीर प्रक्रियेसाठी तब्बल ३ लाख रुपयांचे न्यायालयीन शुल्कही भरण्यात आले आहे. खोपोली नगरपरिषद निवडणुकीच्या काळात घडलेल्या मंगेश काळोखे यांच्या हत्येच्या घटनेशी जोडली गेली आहे. या घटनेनंतर, २७ डिसेंबर २०२५ रोजी आमदार महेंद्र थोरवे यांनी एका वृत्तवाहिनीला दिलेल्या विशेष मुलाखतीत अतिशय खळबळजनक आरोप केले होते. रायगड जिल्ह्यात ‘हिंसक आणि रक्तरंजित राजकारण’ सुरू असल्याचा दावा करत त्यांनी खासदार सुनील तटकरे यांच्यावर थेट निशाणा साधला होता. तटकरे हे या जिल्ह्याचे ‘आका’ असल्यासारखे वावरत असून, त्यांच्याच माध्यमातून कार्यकर्त्यांचे जीव घेतले जात आहेत, असा घणाघाती आरोप थोरवे यांनी केला. तसेच, मंगेश नावाच्या व्यक्तीच्या मृत्यूमागेही तटकरे यांचाच हात असून हा प्रकार पूर्वनियोजित असल्याचा दावा त्यांनी केला होता.
आमदार थोरवे यांच्या या वक्तव्यांमुळे आपली राजकीय आणि सामाजिक प्रतिमा मोठ्या प्रमाणावर डागाळली गेल्याचे खासदार सुनील तटकरे यांनी आपल्या याचिकेत म्हटले आहे. तटकरे यांनी हे सर्व आरोप फेटाळून लावले असून आपल्या तीन दशकांच्या सार्वजनिक जीवनात आपण अनेक महत्त्वाची पदे अत्यंत जबाबदारीने भूषवली आहेत. केवळ राजकीय हेतूने अशा खोट्या आरोपांमुळे समाजात आपली प्रतिमा गुन्हेगारी प्रवृत्तीची आणि दहशत माजवणारी असल्याचा अत्यंत चुकीचा संदेश जात असल्याचे तटकरे यांनी स्पष्ट केले आहे.

खासदार तटकरे यांनी माणगाव येथील दिवाणी न्यायालयाकडे काही ठळक मागण्या केल्या आहेत. आमदार महेंद्र थोरवे यांनी केलेले सर्व आरोप खोटे आणि मानहानी करणारे असल्याचे न्यायालयाने जाहीर करावे, बदनामी करणारे सर्व व्हिडिओ आणि मजकूर सर्व सोशल मीडिया व डिजिटल प्लॅटफॉर्मवरून तात्काळ हटवावेत, अशी मागणी त्यांनी केली आहे. तसेच भविष्यात अशी दिशाभूल करणारी विधाने करण्यास थोरवे यांना मनाई करावी, अशी विनंतीही करण्यात आली आहे. या सर्व मानसिक, सामाजिक आणि राजकीय हानीपोटी ६५ कोटी ३ हजार रुपयांची भरपाई मिळावी, असा दावा तटकरे यांनी केला आहे.