गुरु-शिष्य परंपरेचा जागर ; मातोश्री सुमती चिंतामणी टिपणीस महाविद्यालयात गुरुपौर्णिमा उत्साहात

नेरळ : सुमित क्षिरसागर

नेरळ : दि. ३ ऑगस्ट २०२६ : भारतीय संस्कृतीमध्ये गुरु-शिष्य नाते हे केवळ ज्ञान देणारे आणि घेणारे नाते नसून संस्कार, मूल्ये, नम्रता आणि जीवनाला योग्य दिशा देणारे नाते मानले जाते. याच गुरु-शिष्य परंपरेचे महत्त्व विद्यार्थ्यांना समजावे तसेच गुरुप्रती आदर व कृतज्ञतेची भावना अधिक दृढ व्हावी, या उद्देशाने मातोश्री सुमती चिंतामणी टिपणीस कला व वाणिज्य महाविद्यालय, भमदापूर-नेरळ येथे गुरुपौर्णिमा उत्साहपूर्ण वातावरणात साजरी करण्यात आली.

महाविद्यालयाच्या सांस्कृतिक विभागाच्या वतीने आयोजित करण्यात आलेल्या या कार्यक्रमात विद्यार्थी, प्राध्यापक व शिक्षकेतर कर्मचाऱ्यांनी उत्स्फूर्त सहभाग नोंदविला. कार्यक्रमाची सुरुवात दीपप्रज्वलन, सरस्वती पूजन आणि व्यासपूजनाने करण्यात आली. यानंतर विद्यार्थिनींनी गुरुपौर्णिमेचे महत्त्व विशद करणारी भाषणे, कविता तसेच मनोगते सादर करून आपल्या गुरुजनांप्रती कृतज्ञता व्यक्त केली.

गुरु म्हणजे ज्ञानासोबत संस्कार देणारे मार्गदर्शक

कार्यक्रमाच्या अध्यक्षस्थानी महाविद्यालयाचे प्राचार्य डॉ. नंदकुमार इंगळे होते. यावेळी विद्यामंदिर मंडळाचे विश्वस्त मा. डॉ. मिलिंद पोतदार, संयुक्त सचिव मा. श्री. विवेक पोतदार, प्राध्यापकवर्ग, शिक्षकेतर कर्मचारी आणि विद्यार्थी मोठ्या संख्येने उपस्थित होते.

प्रमुख उपस्थिती म्हणून मार्गदर्शन करताना मा. डॉ. मिलिंद पोतदार यांनी संत चांगदेव आणि संत मुक्ताबाई यांच्या प्रसंगाचा संदर्भ देत गुरुचे जीवनातील स्थान स्पष्ट केले. गुरुच्या मार्गदर्शनातून ज्ञानासोबत नम्रता, आत्मपरिवर्तन आणि जीवनाकडे पाहण्याची सकारात्मक दृष्टी प्राप्त होते. अहंकाराचा त्याग करून गुरुच्या मार्गदर्शनाचा स्वीकार केल्यास जीवनाला योग्य दिशा मिळते, असा प्रेरणादायी संदेश त्यांनी विद्यार्थ्यांना दिला.

‘गुरुंच्या आशीर्वादातून व्यक्तिमत्त्वाचा सर्वांगीण विकास’
कार्यक्रमाचे प्रमुख पाहुणे विद्यामंदिर मंडळाचे संयुक्त सचिव मा. श्री. विवेक पोतदार यांनी आपल्या मनोगतात गुरुच्या महत्त्वावर प्रकाश टाकला. ‘कृष्णं वंदे जगद्गुरुम्’ या विचारातून त्यांनी गुरुंबद्दल मनःपूर्वक आदर, कृतज्ञता आणि समर्पण व्यक्त करण्याचे महत्त्व सांगितले.

गुरु हे विद्यार्थ्यांना केवळ पुस्तकी ज्ञान देत नाहीत, तर त्यांच्या व्यक्तिमत्त्वाला आकार देण्याचे काम करतात. गुरुंच्या मार्गदर्शनातून विद्यार्थ्यांच्या व्यक्तिमत्त्वाचा सर्वांगीण विकास होत असल्याचे त्यांनी नमूद केले.

विद्यार्थ्यांनी ज्ञानप्राप्तीसाठी सातत्याने प्रयत्नशील राहावे
अध्यक्षीय भाषणात प्राचार्य डॉ. नंदकुमार इंगळे यांनी गुरु हे विद्यार्थ्यांच्या जीवनातील प्रेरणास्थान असून ज्ञान, संस्कार आणि मूल्यांचे संवाहक असल्याचे सांगितले. विद्यार्थ्यांनी आपल्या गुरुजनांचा सदैव आदर राखावा आणि ज्ञानप्राप्तीसाठी सातत्याने प्रयत्नशील राहावे, असे आवाहन त्यांनी केले.

विद्यार्थी सहभागाने कार्यक्रमाला रंगत
गुरुपौर्णिमेनिमित्त विद्यार्थिनींनी सादर केलेली भाषणे, कविता आणि मनोगते यामुळे कार्यक्रमाला विशेष रंगत आली. विद्यार्थ्यांच्या सहभागातून गुरु-शिष्य परंपरेबद्दलची आत्मीयता आणि कृतज्ञतेची भावना प्रकर्षाने जाणवली.

कार्यक्रमाचे सूत्रसंचालन प्राप्‍ती शिसवे या विद्यार्थीनीने केले. प्रास्ताविक प्रा. अमोल सोनवणे यांनी केले, तर आभार प्रदर्शन प्रा. वैभव बोराडे यांनी केले.

कार्यक्रमाच्या यशस्वी आयोजनासाठी महाविद्यालयातील शिक्षक, शिक्षकेतर कर्मचारी आणि विद्यार्थ्यांनी विशेष परिश्रम घेतले. गुरुपौर्णिमेच्या या कार्यक्रमातून महाविद्यालयाच्या परिसरात भारतीय संस्कृती, गुरु-शिष्य परंपरा, आदर, संस्कार आणि कृतज्ञतेचा सुंदर संगम अनुभवायला मिळाला.