जय हिंद महाविद्यालयात १०वे जागतिक उद्योजकता शिखर संमेलन..देश-विदेशातील स्टार्टअप्सचा सहभाग; १७०हून अधिक नोंदणी

मुंबई : सुमित क्षिरसागर

मुंबई ता १५ : मुंबईतील नामांकित जय हिंद महाविद्यालयात दिनांक १६ व १७ जानेवारी २०२६ रोजी १०वे जागतिक उद्योजकता शिखर संमेलन मोठ्या उत्साहात आयोजित करण्यात येणार आहे. महाविद्यालयाच्या उद्योजकता कक्ष व कौशल्य केंद्राच्या वतीने होणारे हे शिखर संमेलन गेल्या दहा वर्षांपासून विद्यार्थ्यांमध्ये उद्योजकता, नवोन्मेष आणि नेतृत्वगुण विकसित करणारे प्रभावी व्यासपीठ ठरत आहे.
सन २०१६ मध्ये सुरू झालेल्या या उपक्रमाचा मुख्य उद्देश विद्यार्थ्यांना उद्योजकतेकडे करिअरचा एक सक्षम व व्यवहार्य पर्याय म्हणून पाहण्यास प्रवृत्त करणे हा आहे. उद्योगविश्वाशी थेट संवाद, तज्ज्ञांचे मार्गदर्शन आणि प्रत्यक्ष अनुभवाच्या माध्यमातून उद्योजकीय कौशल्यांचा विकास करण्यावर या संमेलनात सातत्याने भर देण्यात येत आहे.
यंदाची १०वी आवृत्ती “बंधमुक्त क्षितिजे” या संकल्पनेवर आधारित असून, वेगाने बदलणाऱ्या जागतिक व्यावसायिक वातावरणात सीमा ओलांडणाऱ्या नवकल्पना व दूरदृष्टीपूर्ण उपाययोजनांचे महत्त्व अधोरेखित करते. या शिखर संमेलनाला देशासह परदेशातूनही उत्स्फूर्त प्रतिसाद मिळत असून, स्टार्टअप स्पर्धेसाठी १७०हून अधिक नवउद्योजक उपक्रमांनी नोंदणी केली आहे. विशेष म्हणजे या स्पर्धेत आंतरराष्ट्रीय स्तरावरील उपक्रमांचाही सहभाग असणार आहे.
या संमेलनातील प्रमुख आकर्षण असलेली स्टार्टअप सादरीकरण स्पर्धा नवोदित उद्योजकांसाठी सुवर्णसंधी ठरणार आहे. या स्पर्धेत सहभागी उद्योजक आपली व्यवसाय संकल्पना व कार्यपद्धती नामांकित उद्योजक, व्यवस्थापकीय संचालक तसेच भांडवली गुंतवणूक संस्थांच्या प्रतिनिधींसमोर सादर करणार आहेत. यामुळे या उपक्रमांना तज्ज्ञ मार्गदर्शन, उद्योगविश्वात ओळख आणि मोलाचा अभिप्राय मिळणार आहे.
दोन दिवस चालणाऱ्या या भव्य कार्यक्रमात मुख्य मार्गदर्शनपर भाषणे, परिसंवाद, कार्यशाळा तसेच संपर्क व संवाद सत्रांचे आयोजन करण्यात आले आहे. नेतृत्वकौशल्य, नवोन्मेष, ब्रँड उभारणी आणि दीर्घकालीन व्यवसायवृद्धी या विषयांवर विशेष भर दिला जाणार आहे. यंदाच्या शिखर संमेलनातील प्रमुख वक्त्यांमध्ये अनुभव सक्सेना (संशोधन व विकास प्रमुख, पिडिलाईट इंडस्ट्रीज),
मनीष रांदेव (मुख्य कार्यकारी अधिकारी, रुस्तमजी),
रवी सक्सेना (संस्थापक व मुख्य कार्यकारी अधिकारी, वंडरशेफ) आणिनिसान जोसेफ (मुख्य कार्यकारी अधिकारी, मेट्रो ब्रँड्स)यांचा समावेश आहे.
यशस्वी परंपरेचा वारसा
या शिखर संमेलनाच्या मागील सर्व आवृत्त्यांना उद्योगविश्वाकडून मोठा प्रतिसाद लाभला आहे. २०२५ मधील ९व्या आवृत्तीत विविध क्षेत्रांतील मान्यवर वक्त्यांनी उपस्थिती लावली होती, तसेच स्टार्टअप सादरीकरण स्पर्धेत २ लाख रुपयांचे पारितोषिक देण्यात आले होते. तर जानेवारी २०२४ मधील ८व्या आवृत्तीत १२०हून अधिक स्टार्टअप्स आणि ५०पेक्षा जास्त उद्योगतज्ज्ञ सहभागी झाले होते.
या उपक्रमाला जय हिंद महाविद्यालयाचे प्राचार्य डॉ. विजय दाभोलकर आणि अखिल भारतीय तंत्रशिक्षण परिषद संलग्न अभ्यासक्रमांच्या संचालिका डॉ. राखी शर्मा यांचे मार्गदर्शन लाभत आहे. विद्यार्थ्यांच्या समर्पित मुख्य समितीमुळे या संमेलनाचे यश निश्चित होत असून, १०व्या आवृत्तीच्या मुख्य चमूमध्ये निकोले गुहा, निर आवास्कर, सोहम विभुते, सियान माकवाने, भूमिका डिंगरेजा, यशस्वी रावतानी, दिती खत्री, अबिगेल अल्बर्टो आणि नम्रता तलरेजा यांचा समावेश आहे.
दहाव्या वर्षात पदार्पण करणारे जागतिक उद्योजकता शिखर संमेलन हे जय हिंद महाविद्यालयाच्या नवोन्मेषी व उद्योजकीय दृष्टिकोनाचे प्रतीक ठरत असून, विद्यार्थी, नवउद्योजक आणि उद्योगनेते यांना एकत्र आणणारे हे व्यासपीठ भविष्यातील यशस्वी उद्योजक घडविण्याच्या दिशेने एक महत्त्वपूर्ण पाऊल असल्याचे मत व्यक्त केले जात आहे.